Yoon var óstöðvandi

Suður-Kóreu maðurinn Kyung-Shin Yoon átti magnaðan leik fyrir Hamburg gegn Lemgo í þýsku úrvalsdeildinni í handbolta í dag og skoraði alls 18 mörk. Hamburg sigraði í leiknum á útivelli, 37-33.

Ásgeir Örn Hallgrímsson var öflugur í liði Lemgo og skoraði fimm mörk en minna fór fyrir Loga Geirssyni sem skoraði aðeins eitt mark. Yoon skoraði úr 10 skotum utan af velli og úr öllum átta vítaköstum sínum.

Hamburg er í þriðja sæti deildarinnar með 25 stig, tveimur stigum á eftir toppliðum Kiel og Flensburg, en Lemgo er í því sjöunda með 21 stig.