Nýtur þess ekki að spila á HM

Ashley Cole, bakvörður enska landsliðsins og Arsenal, hefur verið einhver besti maður liðsins í keppninni. Hann segist þó alls ekki njóta þess að spila á HM vegna þeirra gríðarlegu pressu sem sé á liðinu í fjölmiðlum.

"Hvernig á maður að njóta þess að spila í keppninni þegar væntingarnar og kröfurnar eru svona miklar. Okkur er ætlað að vinna keppnina og ekkert annað. Okkur hefði verið slátrað í blöðunum ef við hefðum ekki unnið Ekvador á dögunum og ég get ekki notið þess að spila undir þessum kringumstæðum. Það má vel vera að maður geti notið þess að spila á HM í minningunni ef við vinnum keppnina - en það sem af er hef ég sannarlega ekki notið þess," sagði Cole.