Undiralda gegn nýjum virkjunum í sveitum Suðurlands

Neðsta virkjunin og sú stærsta verður við Urriðafoss en henni mun fylgja stærsta uppistöðulónið sem nefnt verður Heiðarlón. Holtavirkjun verður við Árnes og þar mun myndast lón sem kennt verður við eyjuna. Efsta virkjunin, Hvammsvirkjun, verður á móts við Skarðsfjall og þar verður til Hagalón.

Íbúarnir í nágrenni væntanlegra virkjana sjá að undirbúningur er í fullum gangi. Við eyjuna Árnes, þar sem stífla Holtavirkjunar mun girða fyrir gljúfrið, var verið að bora rannsóknarholu í dag. Bóndinn á næsta bæ hjá, Daníel Magnússon á Akbraut í Holtum, fékk fyrir þremur vikum heimsókn frá fulltrúum Landsvirkjunar sem tilkynntu honum að hann þyrfti senn að fara að flytja. Bærinn hans stendur nefnilega þar sem stöðvarhúsið á að rísa. Daníel er engan veginn sáttur enda búið á jörðinni alla sína tíð. Og systir hans neðar í sveitinni sér fram á að virkjunarlón muni ná upp að sínum bæjarhúsum. Hún sakar Landsvirkjunarmenn og stjórnvöld um að vaða yfir heimamenn á skítugum skónum.

Á bænum Herríðarhóli í Ásum sjá þau Arnar Jónsson og Renate Hannemann fram á að fjórðungi af landareigninni verði sökkt. Renate, sem er frá Þýskalandi, telur að margir Íslendingar átti sig ekki á verðmæti landsins sem á að fórna.

Bóndinn á Urriðafossi styður framkvæmdirnar og telur marga sveitunga sína sama sinnis, þótt fossinn verði vart svipur hjá sjón þá eftir.

Bóndinn á Skeiðháholti á Skeiðum bendir á að fyrirhuguð lón verði mun stærri en kynnt var upphaflega fyrir heimamönnum og umhverfisáhrif þeirra mun meiri. Hann segir að boltinn sé nú í höndum Hafnfirðinga, sem muni ákveða það hvort álverið í Straumsvík verði stækkað.