Fatah sakar Hamas um glæpi gegn almenningi í Palestínu

Mohammed Dahlan, einn af áhrifamönnum Fatah-hreyfingarinnar, sakaði í gær Hamas-samtökin um glæpi gegn Palestínumönnum og sagði þeim hafa mistekist að stjórna Palestínu. Dahlan þykir hafa mikil áhrif innan Fatah-hreyfingarinnar en er óbreyttur þingmaður eftir að Hamas vann þingkosningarnar í janúar á þessu ári. Í gær ruddust tugir Palestínumanna inn í palestínska þingið og réðust á þingmenn Hamas-hreyfingarinnar til að mótmæla því að hafa ekki fengið laun sín greidd í rúma þrjá mánuði.

Ríkisstjórnin, undir forsvari Hamas, hefur ekki getað greitt opinberum starfsmönnum laun vegna fjárskorts. Helstu stuðningsaðilar heimastjórnarinnar í Palestínu hafa dregið styrki sína til baka þangað til Hamas fellst á að viðurkenna tilvist Ísraelsríkis.