Barokk í Neskirkju

Rinascente hópurinn heldur tónleika annað kvöld á vegum tónlistarhátíðarinnar „Tónað inn í aðventu." Hópinn skipa þau Hallveig Rúnarsdóttir sópransöngkona, Hrólfur Sæmundsson barítón og Steingrímur Þórhallsson organisti og listrænn stjórnandi hópsins.

Á efnisskránni að þessu sinni eru verk eftir Feneyjatónskáldin Gabrieli og Girolamo Frescobaldi, sem uppi voru á 16. og 17. öld. Gabrieli var eitt þekktasta tónskáld Evrópu á þeim tíma og eitt höfutónskálda á mörkum endurreisnar og barokks. Frescobaldi var einnig áhrifamikill en áhrif hans má meðal annars merkja á tónsmíðum Johanns Sebastians Bach.

Söngverk hans eru glæsileg, en gera miklar kröfur til flytjandans.

„Þetta er tónlist á mörkum endurreisnar og barrokk, annars vegar sönglög og nokkrir dúettar en einnig hljómborðslög frá þessum tíma," segir Hrólfur. „Við flytjum þessa tónlist beint úr handritinunum, milliliðalaust frá tónskáldi til túlkanda." Hann áréttar að músík sem þessi geti skolast til í endurritun og krefjandi sé að rýna í handskrifaðar nóturnar og en hópurinn leitist við að flytja tónlistina í sem upprunalegastri mynd. „Steingrímur á mestan heiðurinn að þessu hann stúderaaði í tónskóla Vatíkansins á sínum tíma og viðaði að sér alls konar efni eins og þessu," útskýrir Hrólfur.

Steingrímur stofnaði Rinascente hópinn árið 2003 en hann hefur frá stofnun einbeitt sér að flutningi barokk og endurreisnartónlistar beint upp úr frumhandritum.

„Þetta verður mjög hugguleg stemmning," útskýrir Hrólfur, „tónleikarnir fara fram í safnaðarheimili Neskirkju og þar er myndast notaleg stemmning." Þess skal einnig getið að hljómburður í safnaðarheimilinu þykir einnig afar góður.

Tónleikar Rinascente hópsins hafa hingað til fengið frábæra dóma og góða aðsókn. Á næsta ári hyggst hópurinn ráðast í flutning á óperu eftir Georg Friedrich Handel.

Tónleikahátíðinni „Tónað inn í aðventu" lýkur nú á sunnudag, en hún er árlegur viðburður í Neskirkju. Tónleikarnir hefjast klukkan 20 annað kvöld.