Einstakir tónleikar

Félagarnir Stefán Hilmarsson og Eyjólfur Kristjánsson halda tvenna útgáfutónleika í Borgarleikhúsinu í kvöld.

Stebbi og Eyvi eru að kynna plötuna Nokkrar notalegar ábreiður sem hefur m.a. að geyma lögin Góða ferð, Pínulítið lengur og nýja útgáfa lagsins Draumur um Nínu, sem markaði upphaf samstarfs þeirra.

Þeim til fulltingis á tónleikunum verður fullmönnuð hljómsveit auk bakradda og sextán manna strengjasveitar.

Að sögn Stefáns stóð upphaflega til að halda eina tónleika en vegna mikillar eftirpurnar var ákveðið að bæta öðrum við. „Við munum spila lögin á nýju plötunni í bland við efni sem hefur fylgt okkur í gegnum árin,“ segir Stefán og útilokar ekki að leynigestur eða -gestir muni stíga á stokk. „Þetta verður alveg einstakt. Það er ekki oft sem við gerum eitthvað þessu líkt saman.“

Fyrri tónleikarnir hefjast klukkan 20.00 og hinir síðari 22.00. Miðasala fer fram á midi.is og á borgarleikhus.is og á midi.is. Þeir sem vilja kynnast lögum plötunnar geta kíkt á slóðina www.ftt.is/stebbiogeyfi.