Aftur í Höllinni

Sálin hans Jóns míns og Gospelkór Reykjavíkur munu halda aðra tónleika í Laugardalshöll þann 30. desember næstkomandi vegna gífurlegrar eftirspurnar.

Síðustu tónleikar Sálarinnar og kórsins voru haldnir þann 15. september við mjög góðar undirtektir. Voru þeir jafnframt teknir upp og verða þeir gefnir út á plötu og á DVD-mynddisk á föstudag. „Þetta gekk vonum framar og small saman eins og flís við rass, bæði tónlistin og söngurinn," segir Óskar Einarsson, stjórnandi Gospelkórsins, um tónleikana. „Allt ferlið gekk vel frá því að við ræddum saman þangað til þetta var búið. Það var ekkert nema friður og kærleikur og jákvæðir straumar," segir hann.

Tónleikarnir með Sálinni voru þeir fyrstu sem kórinn hélt með þekktri popphljómsveit, fyrir utan þátttöku kórsins í kvikmyndinni Í takt við tímann með Stuðmönnum.

Gospelkórinn mun hafa í nógu að snúast á næstunni og mun meðal annars halda átta tónleika í desember, þar á meðal lokaða tónleika með Garðari Cortes.