Halli í tónleikaferð

Trúbadorinn Halli Reynis er að senda frá sér sína sjöundu plötu sem nefnist Fjögurra manna far. Er hún gefin út á vegum Músík ehf. og er þetta í fyrsta sinn sem Halli gerir útgáfusamning á ferli sínum. Í tilefni plötunnar ætlar hann að halda einn með gítarinn í tónleikaferð sem byrjar í kvöld á Græna hattinum á Akureyri. Nánari upplýsingar um tónleikaferðina má fá á Hallireynis.com.

„Þessi plata er unnin með sama mannskap að stærstum hluta og vann með mér plötuna Við erum eins, sem kom út 2004. Nafnið Fjögurra manna far vitnar í að þeir unnu hana með mér," segir Halli. Hann bætir því við að platan sé hrárri en fyrri plötur hans. „Hún er tekin upp „live". Það var allt sungið og spilað í einu og er að því leytinu í sama anda og það sem ég gerði á Við erum eins.

„Mig langaði til að gera hressa plötu eftir kassagítarplötuna í vor. Ég held að hún sé mjög létt og leikandi." 1. desember verður Halli fertugur og ætlar að halda af því tilefni tónleika á Café Rosenberg, sem verða þeir seinustu á tónleikaferðinni. Verða tónleikarnir sendir út beint á Rás 2.