Tvöföldun Suðurlandsvegar verði tryggð tafarlaust

Fulltrúaráð sjálfstæðisfélaganna í Árborg skorar á Alþingi og ríkisstjórn að tryggja tvöföldun Suðurlandsvegar án tafar með lögfestingu verksins á vegaáætlun. Þetta kemur fram í ályktun frá ráðinu. Þar segir einnig að umferð á veginum hafi tvöfaldast á fáum árum auk þess sem bent er á að skipaflutningar hafi lagst af með fram ströndum og fari nú þungaflutningar um vegi landsins.

52 hafi látist á Suðurlandsvegi frá árinu 1972 og hundruð manna hlotið varanlega örorku. Þá nemi fjárhagslegt tjón milljörðum króna. Fulltrúaráðið segir að reynslan af tvöföldun Reykjanesbrautar hafi sannað gildi sitt og nú sé komin röðin að Suðurlandsvegi frá Rauðavatni, yfir Hellisheiði og allt til Þjórsár.