Vinnur nýja rannsókn um samkeppnishæfni landsins

Óli Kristján Ármannsson

skrifar

Einn virtasti viðskiptahugsuður samtímans, Michael E. Porter, kemur hingað til fyrirlestrahalds í haust í boði ráðgjafar- og rannsóknafyrirtækisins IMG. Porter lendir að morgni 2. október og verður dagskrá hans þéttskipuð allan daginn, enda flýgur hann af landi brott síðdegis.

Um morguninn flytur Porter lykilfyrirlestur um samkeppnis­hæfni Íslands sem byggir á nýjum rannsóknum og verður honum síðar um daginn veitt heiðursdoktorsnafnbót við Háskóla Íslands.

Þá heldur Porter fyrirlestur í Háskólabíói um stefnumótun í rekstri fyrirtækja og stofnana, auk þess að sækja heim forseta lýðveldisins á Bessastöðum.

Hákon Gunnarsson, hjá IMG ráðgjöf sem undirbýr komu Porters, segir heimsóknina stórtíðindi fyrir alla sem láti sig stefnumótun og stjórnun varða. "Bækur Porters eru efst á leslistum á fjórða hundrað háskóla um heim allan og kenningar hans fastur liður í kennsluskrá allra skóla sem vilja skipa sér í fremstu röð," segir hann en IMG hefur í um ár undirbúið komu Porters í samvinnu við Háskóla Íslands, iðnaðar- og viðskiptaráðuneytið og styrktarfyrirtækin FL Group, Landsbankann, Fréttablaðið og NFS. Hann býst við góðri aðsókn á fyrirlestur Porters, enda ekki oft sem slíkar kanónur fræðanna sækja landið heim. Hægt verður að skrá sig á aðalfyrirlestur Porters á vef IMG ráðgjafar, www.img.is.

Viðskipta- og hagfræðideild Háskólans tekur þátt í undirbúningi ráðstefnunnar um samkeppnishæfni Íslands og vinnur að gagnasöfnun fyrir rannsókn Porters. Að auki er svo í undirbúningi samstarf deildarinnar við Harvard-háskóla, þar sem Porter gegnir prófessorsstöðu, um kennslu í rekstrarhagfræði á meistarastigi með sérstakri áherslu á samkeppnishæfni fyrirtækja og þjóða. Er það stofnun Porters við Harvard sem hefur boðið viðskipta- og hagfræðideild til samstarfsins, en námið mun standa meistaranemum í öllum deildum Háskólans til boða, líkt og í þeim sextíu háskólum um allan heim sem einnig hefur verið boðið til samstarfsins.

Michael Porter er eftirsóttur ráðgjafi bæði fyrirtækja og stjórnvalda um allan heim og hefur fengið fjölda viðurkenninga fyrir störf sín. Meðal annars hefur hann verið sæmdur heiðursdoktorsnafnbót við Stockholm School of Economics, Erasmus University í Hollandi, Hautes Ecoles Commerciales í Frakklandi, Universidada Tecnica de Lisboa í Portúgal, Adolfo Ibanez University í Chile og INCAE í Mið-Ameríku.