Fengu góð kjör í skuldabréfaútgáfu

Glitnir banki gekk frá útgáfu víkjandi skuldabréfa í Bandaríkjunum að upphæð 500 milljónir Bandaríkjadala eftir lokun markaða vestra á mánudag. Útgáfan jafngildir um 37 milljörðum íslenskra króna og er til 10 ára með innköllunarákvæði eftir 5 ár af hálfu Glitnis.

Kjörin sem bankinn fékk í útgáfunni eru 175 punktar yfir ávöxtunarkröfu 5 ára bandarískra ríkisskuldabréfa, sem sem svarar 123 punktum yfir LIBOR millibankavöxtum. Kaupþing banki gaf úr skuldabréf fyrir 1,25 milljarða dala fyrir um mánuði síðan með kjör upp á 200 punkta yfir ávöxtunarkröfu bandarískra ríkisskuldabréfa. "Þetta er ekki alveg sambærilegt en okkur reiknast til að kjörin hjá okkur núna séu um 30 punktum betri," segir Tómas Kristjánsson, framkvæmdastjóri fjármálasviðs Glitnis.

Hann segir kaupendur að stærstum hluta hafa verið bandaríska stofnanafjárfesta. Umframeftirspurn var eftir bréfunum og alls óskuðu fjárfestar eftir að kaupa fyrir 1.400 milljónir dala, eða sem svarar tæpum 104 milljörðum króna. Umsjón með útgáfunni höfðu alþjóðabankarnir UBS og Credit Suisse.

Tómas segir ljóst að í Bandaríkjunum hugnist fjárfestum vel kaup á bréfum bankans. "Mönnum líst vel á skuldarann, verðið og þá sögu sem verið er að skoða," segir hann, en kveður enn nokkra óvissu ríkja í svokölluðum CDS-gildum, í álagi á skuldabréf bankanna á eftirmarkaði. "Þar er ennþá óvissa og verð sveiflast."