Fimm prósent hagvöxtur

Hagvöxtur á fyrsta ársfjórðungi var fimm prósent á ársgrundvelli samkvæmt Hagstofu Íslands. Árstíðarleiðrétt landsframleiðsla sýnir 4,1 prósent vöxt fyrir sama tímabil.

Þjóðarútgjöld, sem eru samtala neyslu og fjárfestingar, hafa hins vegar vaxið talsvert meira, um 13,7 prósent. Innflutningur jókst um 19,5 prósent. Útflutningur dróst saman 6,4 prósent.

Fram kemur í Hagtíðindum Hagstofunnar að vegna vaxtar í innflutningi og samdráttar í útflutningi hafi landsframleiðsla vaxið mun minna en þjóðarútgjöldin.

Einkaneysla jókst um 12,6 prósent á fyrsta fjórðungi árs. Þá var halli á viðskiptum við útlönd um 25,6 prósent vergrar landsframleiðslu og hefur aldrei mælst meiri.

Fram kemur á vef Greiningar­deildar KB banka að mikil þensla hafi verið í hagkerfinu á fyrsta ársfjórðungi. Því komi vöxtur einkaneyslu ekki á óvart. Greiningardeildin gerir þó ráð fyrir að heldur muni draga úr einkaneyslu á síðari hluta ársins. Samfara því muni ójafnvægi í viðskiptum við útlönd minnka í ljósi gengisveikingar krónunnar.