Fyrsta andlitságræðsla sögunnar framkvæmd í Frakklandi

Læknar í Frakklandi hafa gert fyrstu andlitságræðslu sögunnar. Aðgerðin heppnaðist vel að sögn lækna en hennar var þörf eftir að hundur konunnar beit hana í andlitið þegar hann reyndi að vekja hana eftir að hún reyndi að svipta sig lífi.

Læknarnir segja aðgerðina hafa heppnast vel og að hið nýja andlit virki eðlilegt. Skipt var um nef, varir og höku á konu, sem afmyndaðist þegar hundur beit hana í andlitið í maí síðastliðnum en hundurinn reyndi að vekja konuna eftir að hún reyndi sjálfsvíg. Að sögn konunnar voru fyrstu orð hennar eftir að hún vaknaði: Þakka ykkur fyrir.

Andlitsgjafinn var heiladauð kona á svipuðum aldri og konan en ættingjar konunnar gáfu leyfi fyrir aðgerðinni. Enn á eftir að koma í ljós hvernig ónæmiskerfi andlitsþegans bregst við hinu nýja andliti, og læknarnir segja allt eins líklegt að konan þurfi að vera á sterkum lyfjum ævilangt. Mikil leynd hvíldi yfir aðgerðinni, sem var framkvæmd í Amiens í Frakklandi. Læknar munu greina nánar frá andlitságræðslunni síðar.