Palestínumenn fagna á Gaza

Mikil kæti ríkti meðal Palestínumanna sem streymdu í gær inn í yfirgefnar byggðir ísraelskra landtökumanna á Gazasvæðinu. Síðasti ísraelski hermaðurinn fór þaðan í fyrrinótt en þar með lauk 38 ára hernaðarlegum yfirráðum Ísraela á Gaza. Í Rafah, við landamærin að Ísrael, klifraði fjöldi manna í fagnaðarlátunum yfir landamæravegginn að Egyptalandi. Herskáir hópar Palestínumanna reistu fána að húni, skutu villt upp í loftið úr byssum sínum og kveiktu í yfirgefnum bænahúsum gyðinga. Í látunum varð ungur Palestínumaður fyrir skotum egypsks landamæravarðar og fjórir Palestínumenn drukknuðu undan Gazaströnd, að því er sjúkrahússtarfsmenn greindu frá. Hamsleysi fagnaðarlátanna sýndi greinilega að öryggissveitir palestínsku heimastjórnarinnar eru verkefni sínu illa vaxnar enn sem komið er. Að palestínsk yfirvöld sýni að þau séu fær um að halda uppi lögum og reglu á Gaza er af mörgum álitið prófsteinn á að þau séu fær um að axla ábyrgðina á að tryggja öryggi í sjálfstæðu Palestínuríki. Síðasti ísraelski skriðdrekinn skrölti út úr Gaza rétt fyrir sólarupprás. "Verkefninu er lokið," sagði yfirmaður ísraelska herliðsins á Gaza, Aviv Kochavi, en hann var sjálfur síðasti hermaðurinn sem yfirgaf svæðið. Mahmoud Abbas, leiðtogi palestínsku heimastjórnarinnar, tjáði þjóð sinni að enn væri "langur vegur" eftir að stofnun sjálfstæðs ríkis, en sagði að þessum degi skyldi fagna sem mikilvægum áfanga. Palestínumenn gera sér vonir um að stofna ríki sitt á Gaza, Vesturbakkanum og Austur-Jerúsalem - svæðunum sem Ísraelar hernámu í "sex daga stríðinu" árið 1967 - en þeir óttast að Ísraelar muni ekki láta meira land af hendi. Ariel Sharon, forsætisráðherra Ísraels, segir ríkisstjórn sína enn vilja framfylgja "Vegvísinum til friðar" sem Bandaríkin og fleiri ríki stóðu að og miðar að stofnun sjálfstæðs Palestínuríkis, en sagði hvers konar frekari tilslakanir af hálfu Ísraela vera undir því komnar hvernig Abbas gengur að hafa hemil á palestínskum öfgamönnum.