Skjálftinn skók alla jörðina

Jarðskjálftinn í Indlandshafi á annan í jólum skók skorpu allrar jarðarinnar. Titringur vegna skjálftans mældist víða um heim mörgum vikum eftir hann. Þetta kemur fram í nýjasta hefti tímaritsins Science sem kemur út í dag. Þar kemur ýmislegt fleira fram um skjálftann sem ekki hefur áður verið greint frá. Segja má að skjálftinn annan í jólum hafi slegið fjölmörg heimsmet, enda stærsti skjálfti á jörðinni í meira en fjörutíu ár og því sá eini af þessari stærðargráðu sem hefur verið skoðaður ítarlega með nútímatækni. Skjálftinn kom í kjölfar langmesta misgengis sem mælst hefur og náði gliðnunin á sjávarbotninum yfir meira en þúsund kílómetra svæði. Þá gekk sjávarbotninn allt að tuttugu metra upp á við þar sem mest lét. Skjálftinn stóð yfir í miklu lengri tíma en áður hefur mælst. Lítill skjáfti stendur að jafnaði yfir í minna en eina sekúndu, meðalstór skjálfti í nokkrar sekúndur en skjálftinn undan ströndum Súmötru stóð yfir í hartnær tíu mínútur sem er meira en hundrað sinnum lengri tími en meðalstór skjálfti. Upphaflega var talið að skjálftinn hefði verið níu á Richter en nú er talið að hann hafi náð allt að 9,3. Krafturinn sem skjálftinn leysti úr læðingi jafnast á við hundrað milljarða tonna sprengju að sögn jarðvísindasérfræðinga. Á Taílandi hófst í vikunni á nýjan leik leit að líkum erlendra ferðamanna. Leitinni var hætt fyrir mánuði síðan en tæplega þrjú þúsund manns er enn saknað í landinu og aðstandendur þeirra fóru þess á leit við yfirvöld í landinu að leitinni yrði haldið áfram enn um sinn. Alls er meira en fimmtíu þúsund manna enn saknað eftir skjálftann auk þess sem staðfest hefur verið að tæplega 180 þúsund manns hafi látist.