Sagður franskur götutónlistarmaður

Pólskur látbragðsleikari segir að dularfulli píanóleikarinn, sem skaut upp kollinum í Bretlandi fyrir mánuði, sé götutónlistarmaður frá Suður-Frakklandi. Píanóleikarinn dularfulli hefur ekki mælt orð af vörum síðan hann fannst rennandi blautur á strönd í Kent fyrir mánuði. Hann var í smóking og lögreglan telur að hann hafi lent í sjónum. En hvar eða hvernig veit enginn. Hann er enn á bresku sjúkrahúsi og er sagður mjög óöruggur og óttasleginn. Talið er mögulegt að hann hafi misst minnið. Sem fyrr segir talar hann ekki við neinn en leikur klassíska tónlist klukkustundum saman. Hann þykir það fær að lögreglan leitaði til sinfóníuhljómsveita um alla Evrópu en þar kannaðist enginn við hann. Frekari eftirgrennslan hefur einnig reynst árangurslaus og því greip lögreglan til þess ráðs að dreifa myndum af honum um alla álfuna og segja sögu hans. Nú hefur pólskur látbragðsleikari gefið sig fram við lögregluna á Ítalíu. Hann segir að maðurinn heiti Steven Villa Masson og hann hafi þekkt hann sem götutónlistarmann í borginni Nice í Suður-Frakklandi. Breska lögreglan er nú að kanna þessar nýju upplýsingar.