Staða krónunnar lykilatriði

Ingólfur Bender, forstöðumaður greiningardeildar Íslandsbanka, segir að staða íslensku krónunnar ráði mestu um hvernig verðlagsþróun verði á næstu misserum. "Okkar spá er sú að ef gengi krónunnar helst á þeim slóðum sem það er nú á þá muni verðbólgan fara niður um mitt árið og yrði lægri en verðbólgumarkmið Seðlabankans segir til um út þetta ár." Hann telur þó blikur á lofti um að sú forsenda haldi. "Ef eitthvað er þá reiknum við heldur með að krónan gefi eftir þegar líður á árið. Það er stór óvissuþáttur. Við sjáum misvægið í hagkerfinu þegar við lítum á viðskiptahallann og einhvern tímann kemur það misvægi fram í lækkun á gengi krónunnar," segir Ingólfur. Annað atriði sem Ingólfur telur vert að fylgjast með er þróun á húsnæðismarkaði. Síðustu tölur benda til þess að mikil hækkun sé á verðmæti húseigna um þessar mundir og ef sú hækkun heldur áfram þá muni það hafa í för með sér að verðbólgan verði mun hærri en Íslandsbanki hefur spáð. "Áhættan í okkar spá er því klárlega upp á við. Það eru líkur á því að við eigum eftir að sjá verðbólguna yfir verðbólgumarkmiðinu þegar árið er liðið," segir hann. Sú þróun veldur áhyggjum um að slæm keðjuverkun fari af stað sérstaklega ef forsendur kjarasamninga bresta og að launaliður kjarasamninga verði tekinn til endurskoðunar til hækkunar næsta vetur. "Það sem Seðlabankinn er að berjast við í augnablikinu er að bjarga kjarasamningum. Fyrir utan að ná verðbólgunni niður þá er það sjálfstætt viðfangsefni að koma í veg fyrir að launaliður þeirra verði endurskoðaður til hækkunar," segir hann. Ingólfur segir hlutdeild hins opinbera í hækkun neysluverðsvísitölunnar nú vera stóran og telur því til viðbótar að aðhald hins opinbera sé ónógt. "Þess vegna lendir þetta meira og minna á Seðlabankanum og við sjáum þetta ójafnvægi í hagkerfinu sem kemur fram í viðskiptahalla, sterkri krónu og versnandi stöðu útflutningsatvinnnuveganna," segir Ingólfur.