Verðbólgan kemur ekki á óvart

Arnór Sighvatsson, aðalhagfræðingur Seðlabankans, segir að nýjar verðbólgutölur, sem sýna að verðbólgan er við efri þolmörk Seðlabankans, komi ekki á óvart. "Þetta er í samræmi við okkar spár og ekkert óvænt að gerast. Við vissum að það væri líklegt að við færum yifr þessi mörk snemma á þessu ári og það hefur legið fyrir frá því snemma á síðasta ári," segir hann. Hann segir vonir hins vegar standa til þess að ársverðbólgan lækki töluvert þegar líður á árið. "Ef okkur tekst að halda okkur innan við þær hækkanir sem urðu í mars og apríl í fyrra munum við sjá hjaðnandi verðbólgu nú á vormánuðum," segir Arnór. Nokkuð hefur verið gagnrýnt að opinberar gjaldskrárhækkanir hafi lyft verðbólgunni í síðustu mælingu. Arnór segir hins vegar að það ætti ekki að hafa komið á óvart að slíkar hækkanir ættu sér stað í þessum mánuði, það væri alvanalegt, og hækkanirnar nú séu minni en þær voru í fyrra. "Það sem hefur verið að gerast á síðustu árum er að verðlag á opinberri þjónustu hefur verulega dregist aftur úr hækkunum á almennum markaði. Síðan hafa þessar gjaldskrár verið að rétta sig af og nálgast verðbreytingar annars staðar," segir hann. Arnór á því von á að verðbólga fari hjaðnandi á næstu mánuðum. "Það sem er að hjálpa okkur er sterkt gengi krónunnar," segir hann. Arnór segir að Seðlabankinn hafi brugðist kröftuglega við þróun í efnahagsmálum með vaxtahækkunum á síðasta ár og minnir á að bankinn hafi gefið sterklega í skyn að hann muni áfram hækka stýrivextina. Hann segir einnig að varast beri að gera of mikið út gildi hinna svokölluðu þolmarka vaxtastefnu Seðlabankans. "Auðvitað er ekki mikill munur á fjögurra prósent verðbólgu og 4,1 prósent verðbólgu. Það eina sem gerist er að við þurfum mað skrifa þetta bréf," segir hann. Um áframhaldandi þróun segir Arnór að fyrst og fremst huga að því sem að honum snýr og beita þeim tækjum sem hann býr yfir. "Auðvitað myndi það hjálpa mikið ef frekara aðhald kæmi frá öðrum vígstöðvum; svo sem ríki og sveitarfélögum," segir hann.