Hverfið mitt

Ég bý í frábæru hverfi hérna á Norðurbrú í Kaupmannahöfn, hverfið er eiginlega svona 101 Köben og er mjög blandað. Það er moska við hliðina á kaffihúsinu okkar strákanna og hingað streyma múslimarnir til bæna oft á dag, aðeins ofar er svo félagsmiðstöð Afríkubúa og eru þeir oft mjög skrautlegir til fara. Í götunni minni er svo Sushi staður sem heitir Selfish og er í eigu Kauro sem er Japani, pitsustaðurinn Hugos sem er í eigu Írana og "take awaystaðurinn" Kazims Kitchen en þar er eigandinn tyrkneskur. Á einu horninu er svo Osbourne´s sem er í eigu Englendings og er fótboltabar hverfisins en beint á móti okkur er svo The Bagel Company sem er í eigu Gyðings að ógleymdri Maríu sem á tehúsið Tea Time en hún er frá New York ! Svo er náttúrlega kaffihúsið sem er í eigu íslensku mafíunnar, en það nafn fengum við fljótlega eftir komu okkar í hverfið, meint í gríni að sjálfsögðu. Þetta er sem sagt svona fjölþjóðlegt samfélag og virkar svona líka glimrandi vel. Það sem mér finnst svo frábært við hverfið mitt er að það er mjög mikil samkennd hérna og allir til í að hjálpa öllum. Við strákarnir vorum til dæmis að vinna eitt kvöldið við að byggja staðinn okkar, búnir að vera fjórtán tímana upp á dag í tvo og hálfan mánuð þegar Kauro birtist allt í einu með risastóran bakka af flottustu sushi-bitum sem ég hef séð. Klukkan var um átta og við vorum um það bil að fara að panta pitsu í sjötugasta skiptið. Þetta var fallegt sumarkvöld og ég mun aldrei gleyma því hvað ég og við allir vorum undrandi og þakklátir fyrir þennan vinargreiða. Svo settumst við allir við eina borðið sem búið var að smíða, drulluskítugir upp fyrir haus í vinnugöllunum með sag og verkfæri út um allt og gæddum okkur á sushi ! Í annað skipti fengum við svo pitsur frá Hugos, og undantekningalaust fengum við afslátt á "take away" kaffi og samlokum frá fyrirtækjunum í götunni. Þegar svo kom að því að opna staðinn þá streymdu til okkar gjafir í formi konfekts, kampavíns og rauðvínsflaskna, bóka , blómvanda og fleira. Við vorum bókstaflega orðlausir. Vðtökurnar hafa verið fram úr björtustu vonum þó að ekki séu biðraðir eins og sagt hefur verið frá heima. Þessi velgengni er ekki síst því að þakka að staðurinn er í eigu okkar fjögurra þar sem fjármálunum er stjórnað af Brynjólfi Garðarssyni framkvæmdastjóra sem einnig er meistarakokkur og eldar mat á staðnum ásamt yfirkokkinum Þóri Bergssyni sem heimtar kaffi reglulega frá veitingastjóranum Ingva Steinari Ólafssyni sem stýrir barnum og salnum. Ég aðstoða svo Ingva í salnum og er í gríni kallaður yfirmaður þróunarsviðs ! Annars erum við að bíða eftir sumrinu og erum bara hressir. Kveðja Frikki