Tekið fyrir sölu á eBay

Uppboðsvefurinn eBay hefur ákveðið að stöðva sölu á miðum á Live 8 tónleikana sem haldnir verða í Lundúnum 2. júlí næstkomandi. Tónleikarnir eru haldnir til að efla vitund fólks um eymd margra Afríkuþjóða en miðunum á þá var útbýtt í gegnum farsímahappdrætti. Forsvarsmenn hljómleikanna urðu æfir þegar þeir komust að því að fólk var að græða stórfé á að selja þá fyrir allt að 125.000 krónur. "Þetta er sjúk fjárplógsstarfsemi," sagði Bob Geldof, talsmaður tónleikanna, en hann þrýsti mjög á eBay að hætta að hafa milligöngu um miðasöluna. Live 8 tónleikar verða haldnir í fimm borgum en á þeim sem haldnir verða í Lundúnum koma meðal annars fram hljómsveitirnar Pink Floyd og Coldplay.