Halldór verður við útförina

Halldór Ásgrímsson forsætisráðherra verður viðstaddur jarðarför Jóhannesar Páls páfa II í Róm á föstudaginn. Upplýsingafulltrúi forsætisráðuneytisins, Steingrímur Ólafsson, og Hörður Bjarnason, sendiherra Íslands gagnvart Vatíkaninu, verða með í för.

Páfi verður jarðsunginn snemma á föstudagsmorgun og hefst athöfnin í Vatíkaninu klukkan átta að íslenskum tíma. Hann verður svo jarðaður í grafhvelfingu undir Péturskirkjunni líkt og aðrir páfar.

Búist er við að um 200 þjóðarleiðtogar verði við jarðarförina, m.a. Bush Bandaríkjaforseti, Blair, forsætisráðherra Bretlands, og Schröder, kanslari Þýskalands.