Vildi myrða ættingja vegna arfs

Sautján ára stúlka kom fyrir rétt í Svíþjóð í gær ákærð fyrir að reyna að myrða sex ættingja sína. Móðir hennar var myrt með hamri og faðirinn liggur í dái á sjúkrahúsi. Stúlkan vildi erfa peninga fjölskyldunnar. Stúlkan hafði reiknað út að ef hún myrti foreldra sína, þrjú systkini og ömmu, þá myndi hún erfa um 100 milljónir íslenskra króna, geta farið í fegrunaraðgerð og lifað ljúfu lífi með kærasta sínum sem er átján ára. Fyrst reyndi parið að finna sér leigumorðingja á Netinu og bauð tíu milljónir króna fyrir verknaðinn. Þegar boðinu var ekki tekið ákváðu þau að fremja ódæðið sjálf. Þau bjuggu í Stokkhólmi, en 20. apríl síðastliðinn tóku þau lest til bæjarins Gislaved þar sem foreldrarnir bjuggu. Gislaved er suðaustan við Gautaborg. Klukkan eitt um nóttina læddust þau inn í hús foreldranna þar sem allir voru í fastasvefni. Kærastinn fór inn í svefnherbergi foreldranna og barði þau mörgum sinnum í höfuðið með hamri. Móðirin lét lífið en faðirinn liggur í dauðadái á sjúkrahúsi. Stúlkan fór hins vegar inn í svefnherbergi systur sinnar sem er 24 ára gömul. Hún hefur skýrt frá því að hún hafi vaknað við neyðaróp móður sinnar og þegar hún opnaði augun stóð litla systir hennar yfir henni með hamar í hendinni. Henni tókst þó að forða sér og komast til nágranna sem hringdu á lögreglu og sjúkrabíl. Parið var handtekið skömmu síðar. Það hefur sagt lögreglunni að eftir að hafa drepið ættingjana í Gislaved hafi verið ætlunin að fara aftur til Stokkhólms og myrða þar tvo bræður stúlkunnnar og ömmuna.