Universal skoðar íslenska tónlist

Plöturisinn Universal Records mun standa fyrir áheyrnarprufum í samvinnu við Shockwave hópinn og FM957, laugardaginn 26. júní næstkomandi á Broadway. Þrír starfsmenn fyrirtækisins, svokallaðir A&R menn, sem starfa við það að leita að nýjum listamönnum munu koma hingað til lands og hlýða á íslenska listamenn spreyta sig. Mennirnir sem mæta heita Lyonel Rosemund sem fann Erykuh Badu á sínum tíma, James Eichelberger og Jamall Troupe sem uppgötvuðu Lumidee. Áheyrendaprufurnar fara fram yfir daginn og búist er við því að allar helstu poppsveitir landsins fái að spreyta sig. Sú uppákoma verður opin fyrir alla aldurshópa svo að útsendararnir sjái sveitirnar í sínu rétta umhverfi. Um kvöldið munu erlendir tónlistarmenn svo halda uppi stemmningu að hætti Shockwave. Blaðamenn frá hiphoptímaritinu The Source hafa þegar boðað komu sína og MTV sjónvarpsstöðin hefur sýnt verkefninu mikinn áhuga samkvæmt talsmönnum Shockwave. Nýliðum verður gefið tækifæri til þess að spreyta sig og eru áhugasamir beðnir um að senda upplýsingar á rnb@simnet.is eða jayharden1@yahoo.com. Skylda er að senda mp3 prufulög með póstunum, aðeins er beðið um umsóknir frá þeim sem er fullalvara.