Hagnaður Samherja 1,7 milljarðar

Hagnaður Samherja á þriðja ársfjórðungi nam 577 milljónum króna og það sem af er ári hefur félagið hagnast um 1,7 milljarða. Umfang félagsins hefur aukist mkið á milli ára meðal annars vegna kaupanna Cuxhavener Reederei í Þýskalandi. Hagnaðurinn á síðasta ársfjórðungi er töluvert undir spám greiningardeilda bankanna. Hins vegar er tekjuaukningin hraðari en búist var við auk þess sem árangur Samherja í útgerð skipa sinna þykir mjög góður. Landvinnslan hefur hins vegar ekki gengið sérlega vel. Rekstur fiskeldis á vegum Samherja hefur gengið mjög illa á þessu ári. Tap Oddeyrar, sem rekur fiskeldisstöðvar Samherja, er fjögur hundruð milljónir það sem af er ári. Í tilkynnningu frá Samherja segir að afkoma Oddeyrar sé "óviðunandi". Þar segir einnig að lágt afurðaverð og óhagstætt gengi gjaldmiðla hafi haft neikvæð áhrif á rekstur Oddeyrar. Auk þessa kom upp skjúkdómur í stærstu eldisstöðinni og hafði það einnig áhrif á afkomuna. Fram kemur í frétt Samherja að unnið sé að endurskipulagningu á rekstri Oddeyrar.