Niðurfærsla í Frakklandi

Afkoma SÍF fyrstu níu mánuði ársins var nokkru lakari en greiningaraðilar höfðu spáð. Félagið tapaði 1,7 milljörðum króna á tímabilinu. Stærstur hluti tapsins er vegna þess að verðmæti fasteigna og vörubirgða í Frakklandi var fært niður um 1,2 milljarða króna. "Við erum með metnaðarfullar áætlanir um framtíðina og það þýðir ekki að byggja þær á sandi," segir Jakob Sigurðsson, forstjóri SÍF. Hann segir að því hafi verið ákveðið að fá óháðan endurskoðanda til þess að vita nákvæmlega hver staðan væri í Frakklandi. SÍF gekk í gær frá sölu á tæplega fjórðungshlut sínum í Sölumiðstöð Hraðfrystihúsanna. Landsbankinn miðlaði bréfunum en kaupandi var SH sjálft. Hlutföll helstu eigenda SH breytast því ekki að öðru leyti en því að SÍF hverfur úr hluthafahópnum. Félag má ekki eiga svo stóran hlut í sjálfu sér til lengdar, þannig að annað hvort þarf að finna kaupanda að hlutnum eða færa hlutafé SH niður.