Hagar eignast Skeljung

Hagar sem reka meðal annars verslanir Bónuss og Hagkaupa hafa keypt olíufélagið Skeljung. Hagar keyptu allt hlutafé Sólvinda af Pálma Haraldssyni og Jóhannesi Kristinssyni sem hafa átt í sameiningu fjárfestingarfélagið Feng. Í skiptum fékk Fengur hlutafé í Högum. Pálmi fer því með álíka stóran hlut í Högum og Baugur eftir viðskiptin eða á bilinu 27 til 28 prósent. Jón Björnsson, forstjóri Haga, segir þá þróun víða í nágrannalöndunum að bensínstöðvar og stórmarkaðir séu undir sama hatti. "Við sjáum í þessu ýmis tækifæri til að koma til móts við íslenska neytendur." Hann bendir á að Hagkaup og Bónus hafi komið að stofnun Orkunnar á sínum tíma og með því stuðlað að lægra bensínverði. Pálmi Haraldsson verður áfram stjórnarformaður Skeljungs og ekki sé ætlun að gera breytingar á yfirstjórn félagsins. Pálmi segir sameiningu félaganna skynsamlega. "Við þetta verður til eitt öflugt félag með mikla veltu." Hann segir slíkt félag vel fallið til skráningar á hlutabréfamarkað. Sameinað félag veltir yfir fimmtíu milljörðum króna.