Stór uppgjör í dag

Í dag verða birt uppgjör fjögurra stórra fyrirtækja í Kauphöll Íslands. Íslandsbanki, Tryggingamiðstöðin, Össur og Straumur gefa út afkomutölur fyrir þriðja ársfjórðung. Nú þegar liggur fyrir uppgjör Íslandsbanka fyrir fyrstu átta mánuði ársins en það var gefið út þegar tilkynnt var um fyrirhugaða hlutafjáraukningu í félaginu í lok september. Á fyrstu átta mánuðum ársins hafði Íslandsbanki hagnast um 10,2 milljarða króna. Greiningardeild Landsbankans spáir því að hagnaður Íslandsbanka á þriðja ársfjórðungi verði 3,1 milljarður en KB banki spáir 3,5 milljarða hagnaði. Allar greiningardeildirnar hafa gefið út spár fyrir Straum. Spár um hagnað Straums á öðrum ársfjórðungi liggja á bilinu 2,9 til 3,1 milljarðs króna. Össuri reiknar uppgjör sín í Bandaríkjadölum og spá greiningardeildirnar að hagnaður félagsins á þriðja ársfjórðungi nemi á bilinu 3,6 til 3,9 milljónir Bandaríkjadala. Það samsvarar 250 til 270 milljónum íslenskra króna. KB banki og Íslandsbanki hafa gefið út spá um afkomu Tryggingamiðstöðvarinnar. KB banki spáir því að félagið hagnist um 154 milljónir á þriðja ársfjórðungi en Íslandsbanki er heldur bjartsýnni fyrir hönd félagsins og spáir því að hagnaðurinn verði 369 milljónir króna.