Aldrei meiri stigalækkun

Úrvalsvísitalan hefur aldrei lækkað um jafnmörg stig á einum degi eins og í gær. Í byrjun dags stóð hún í 3.820 stigum en féll stöðugt á meðan markaðurinn var opinn og fór lægst í 3.695 stig. Hún rétti svo lítillega úr kútnum undir lok dags og endaði í 3.707 stigum. Lækkunin var því 113 stig. Samanlagt markaðsverðmæti fyrirtækjanna í Úrvalsvísitölunni lækkaði um 29 milljarða króna. Þótt fall Úrvalsvísitölunnar í stigum talið sé hærra en nokkru sinni fyrr þá segir hlutfallsleg lækkun meira. Dagurinn í gær var hinn ellefti versti frá upphafi. Lækkun vísitölunnar er 2,97 prósent. Líta þarf aftur til 2. maí 2001 til að sjá meiri hlutfallslækkun vísitölunnar. Þann dag lækkaði Úrvalsvísitalan um 4,62 prósent. Þórður Pálsson, forstöðumaður greiningardeildar KB banka, segir að lækkunin í gær komi ekki á óvart. "Þetta er í sjálfu sér í rökréttu samhengi við þann lækkunarþrýsting sem verið hefur að undanförnu. Annars vegar er verð á hlutabréfum orðið mjög hátt og miklar væntingar bundnar í því. Síðan kemur hið gríðarlega framboð á hlutabréfum ofan í það," segir hann. Hann telur að hið mikla framboð sem nú er fyrirsjáanlegt á nýjum hlutabréfum kunni að hafa verið vendipunkturinn um að markaðurinn sé nú að gefa eftir.