Ray Charles allur

Faðir soul-tónlistarinnar er allur. Ray Charles lést í gær, sjötíu og þriggja ára að aldri. Ray Charles var fyrsti tónlistarmaðurinn sem blandaði saman rhythm and blues við gospel-tónlist og skapaði þannig í raun soul-tónlistina. Hann er því réttnefndur faðir soul og er talinn með áhrifamestu tónlistarmönnum síðustu aldar. Tónlistar "spekúlantar" segja að það hafi verið sögulegur viðburður þegar Charles hélt með hljómsveit sinni inn í hljóðver háskólaútvarpsstöðvar í Atlanta árið 1954 og tók þar upp lagið I got a woman. En Ray Charles hélt sig ekki við soul-tónlistina, heldur lék það sem hann langaði að leika. Country-tónlist, popp, jazz, swing og jafnvel hip-hop má heyra á plötum hans, og þekktustu lögin hans, Georgia on my mind og Hit the road, Jack, eru sígildir. Ray Charles varð blindur sjö ára, og er talið að hann hafi þjáðst af barnagláku. Hann missti báða foreldra sína fimmtán ára og skömmu síðar hóf hann tónlistarferil sinn og ferðaðist með hljómsveit sinni um Bandaríkin. Áratugum saman var hann meðal áhrifamestu tónlistarmanna heims og ruddi öðrum svörtum tónlistarmönnum leið. Ray Charles lést á heimili sínu í Beverly Hills í Kaliforníu í gær, en hann hafði barist við lifrarsjúkdóm. Áður en hann lést tókst honum nánast að leggja lokahönd á síðustu plötuna sína, en það er tvísöngsplata þar sem Elton John, Nora Jones, Willie Nelson og fleiri syngja með honum. Ray Charles kom síðast fram opinberlega þrítugasta apríl síðstliðinn þegar hljóðver hans var lýst eitt af sögulegum kennileitum Los Angeles borgar.