Gollum breytist í King Kong

Breski leikarinn Andy Serkis, sem lék Gollum í The Lord of the Rings, ætlar næst að bregða sér í hlutverk górillunnar King Kong í endurgerð myndarinnar sem kemur út í lok næsta árs. Górillan ógurlega verður tölvugerð í alla staði en Serkins verður notaður til að gera hana aðeins raunverulegri með aðstoð nýjustu tækni; þeirri sömu og notuð var í The Lord of the Rings. Serkis verður einnig í hlutverki kokksins Lumpy í myndinni og fær því að spreyta sig á tvennum vígstöðum. Leikstjóri King Kong er Peter Jackson sem vann Óskarsverðlaun fyrir Hringadróttinssögu. Þónokkrir sem unnu með honum að þeirri mynd munu einnig hjálpa honum við gerð King Kong. Á meðal þeirra verður tónskáldið Howard Shore og handritshöfundarnir Fran Walsh og Philippa Boyens. Í aðalhlutverkum verða Naomi Watts, Jack Black og Adrien Brody, sem vann Óskarsverðlaunin fyrir hlutverk sitt í The Pianist. Tökur á King Kong hefjast í Nýja Sjálandi í ágúst en þar var The Lord of the Rings einmitt tekin upp.