Uppistand og vídeósketsar

"Við Sindri Páll Kjartansson erum búnir að fara út um allt land með skemmtun þar sem við fléttum saman vídeósketsum og uppistandi," segir leikarinn Þorsteinn Guðmundsson en hann frumsýnir skemmtidagskrána Fútt og tjútt í Leikhúskjallaranum í kvöld. "Þetta verður svona kokkteill af uppistandi, vídeósketsum og tónlist því til að fólk fái meira fyrir pakkann fórum við í samstarf við Toppruglmenn en það eru plötusnúðarnir Árni Sveinsson, Gísli Galdur, Kristinn Gunnar og Dj. Kári. Þeir verða með okkur á sviðinu og taka svo við og verða með Topprugl fram á morgun." Þorsteinn semur uppistandið en myndbandsskeið sýningarinnar er í leikstjórn Sindra Páls. "Þar koma fram margir þekktir grínistar sem lögðu okkur lið til að gera þetta allt sem fjölbreytilegast. Við erum búnir að lenda í alls konar rugli á ferðinni um landið og það má segja að uppistandið hafi þróast á leiðinni. Við erum búnir að þétta prógrammið, taka út allt sem var meðalgott og eftir situr einungis það sem er frábært," segir Þorsteinn en í kvöld kemur hann meðal annars inn á forsetamálin. "Ég tala mikið um jakkaföt og hunda í peysum en þessar tengingar við forsetamálið eru mikilvægar þó þær hafi ekki verið mikið í umræðunni." Fútt og tjútt í Leikhúskjallaranum opnar klukkan 22.00 í kvöld.