Full­yrða að Daði Már hafi logið að þinginu

Guðlaugur Þór Þórðarson, Sjálfstæðisflokki, hóf umræðuna og sagði það svo að 19. október síðastliðinn hafi hann spurt fjármálaráðherra hvað hann vissi um tildrög þess að Hörður sagði starfi sínu lausu. Guðlaugur sagði Daða hafa svarað því svo til, með þjósti, að sagan öll væri sögð; forstjórinn hefði ekki hrökklast úr starfi eftir 17 ára farsælt starf.

Nú lægi hins vegar fyrir að svo væri ekki og hann krafðist þess af Þórunni Sveinbjarnardóttur forseta Alþingis að hún beitti sér fyrir því að Daði Már mætti til að gera grein fyrir máli sínu strax í dag.

Fjölmargir stjórnarandstæðingar fóru í pontu í umræðu sem stóð í rúman hálftíma. Þeir töldu fulla ástæðu til að ræða þetta betur og nefndu að í ljós hefði komið að starfsmenn fjármálaráðuneytis hefðu haldið frá apríl níu fundi með stjórn, án forstjóra.

Fram kom í yfirlýsingu stjórnar Landsvirkjunar í gær að Hörður eða staðgengill hans hefðu setið þá fundi með ráðuneytinu þar sem málefni tengd rekstri Landsvirkjunar hefðu verið rædd.

Jens Garðar Helgason, Sjálfstæðisflokki, sagði þetta óeðlileg afskipti eiganda og stjórnar. Hann sjálfur hafi átt sæti í stjórn Landsvirkjunar í ár og hann hafi ekki setið einn einasta slíkan fund með starfsmönnum ráðuneytisins eða ráðherra. „Þetta er orðið mjög óeðlilegt.“

Þá vísuðu stjórnarandstæðingar til þeirra orða Harðar að hann óttaðist afskipti stjórnar og að þau stefndu rekstri Landsvirkjunar í hættu.

Jón Gunnarsson, Sjálfstæðisflokki, var meðal þeirra sem tóku til máls og hann sagði þetta grafalvarlegt mál og að nú væri komið á daginn að ráðherra hefði sagt þinginu ósatt, hann hefði talað gegn betri vitund. „Hann greindi þinginu ranglega frá, fjölmiðlum og þar með þjóðinni.“