Upp­gjörið: Álftanes-Keflavík 130-110 | Sóknarbolti á föstu­dags­kvöldi

Álftnesingar sigruðu Keflvíkinga 130-110 í hröðum og stórskemmtilegum leik í kvöld.

Keflvíkingar komu sterkari til leiks en Álftnesingar voru með fá svör varnarlega og þá sérstaklega við honum Jamir Chaplin sem dró vagninn með 29 stig ásamt Hilmari Péturssyni sem var með 32 stig fyrir Keflavík.

Keflvíkingar komust mest í 9 stiga forystu í 1. leikhluta sem þeir virtust ætla að bæta við en þegar einungis 1. mínúta var eftir af 1. leikhlutanum náðu Álftnesingar að drepa hana niður í 3 stig. Staðan eftir 1. leikhluta var því 29-32.

2. leikhluti fór aðeins hægar af stað en bæði lið skiptust á höggum. Ef annað liðið skoraði þá skoraði hitt og svo ef annað liðið náði stoppi. Það gerðist alveg eins hinum megin og staðan í hálfleik var 63-61. Það var mikið skorað en leikurinn var líka hraður og mikið af skotum sem voru tekin.

Í seinni hálfleik var svipað upp á teningnum. Bæði lið skiptust á körfum og stefndi leikurinn í að verða mjög spennandi. Þegar 25. sekúndur voru eftir af 3. leikhluta komst Hilmar Pétursson á vítalínuna og kom Keflvíkingum í stöðuna 92-93. Álftnesingar fara hinum megin í sókn sem endar með þrist frá bróður hans og staðan eftir 3. leikhluta var 95-93 og þakið á Kaldalónshöllinni ætlaði af.

Þetta skilaði sér inn í 4. leikhluta fyrir heimamenn sem tóku öll völd leiddir af Sigurði Péturssyni sem skoraði 36 stig og stal boltanum 5 sinnum. Þeir byggðu upp forskot hægt og rólega á meðan gestirnir reyndu að skjóta sig inn í leikinn aftur sem heppnaðist ekki. Lokatölur 130-110 virkilega sterkur sigur Álftnesinga sem stóðust fyrsta stóra prófið.

Atvik leiksins

Atvik leiksins er byrjunin á 4. leikhluta en þá komust Álftnesingar í 10 stiga forystu á aðeins 2 mínútum. Eftir það sáu Keflvíkingar ekki til sólar eftir að hafa spilað afar góðan leik upp að því.

Stjörnur og skúrkar

Stjörnur þessa leiks voru Pétursson. Annars vegar stóri bróðir hans Hilmar Pétursson og litli bróðir hans Sigurður Pétursson. Litli bróðir hafði betur í þetta skiptið bæði í stigaskori og í leiknum sjálfum.

Skúrkurinn er sennilega formið á Jamir Chaplin en hann fékk krampa rétt áður en Álftanes tók yfir og var lítið með í 4. leikhluta.

Dómarar

Jóhannes Páll, Bjarni Hliðkvist og Sigurbaldur voru með flautuna í þessum leik. Þeir stóðu sig bara með prýði en línan hjá þeim færðist svolítið til en það var ekkert til að kvarta yfir þannig séð.

Stemning og umgjörð

Stemningin í Kaldalónshöllinni var fyrirmynd. DJ á svæðinu. Hamborgarar á grillinu og nánast fullt hús. Þeir kunna þetta á Álftanesinu.

Baldur: „Gátum ekki stoppað Chaplin”

Baldur Þór Ragnarsson, þjálfari Álftanessliðsins, var að vonum kampakátur með að hafa unnið leikinn á móti Keflavík í kvöld.

„Ég er bara ánægður með að hafa unnið í erfiðum leik,” sagði Baldur strax eftir leik. „Við vorum að fá á okkur 30 stig í leikhluta en fáum á okkur 17 í fjórða og náum stoppum. Þeir misstu Chaplin út. Hann er elítuspilari og það hjálpaði þeim ekki. Það hjálpaði okkur. Hann var frábær og við réðum ekki við hann. Hilmar var líka frábær, báðir í 30 stigum. Varnarleikurinn okkar réði illa við þessa leikmenn og Keflavík var frábær sóknarlega,” bætti Baldur svo við en góður sóknarleikur var einmitt svolítið lykilorðið í þessum leik.

Bæði lið voru frábær sóknarlega en til þess að vinna leiki þurfa lið að geta stoppað frábær sóknarlið en Álftanes skoraði síðan 130 stig hinum megin.

„Hvort sem það var hálfur völlur, transition eða hvað sem það var þá var það frábært flæði, frábær samvinna og góð hittni. Ekkert til að kvarta yfir á sóknarvelli. Bara vel spilaður leikur þeim megin á vellinum. Það hljóta að vera einhverjir ánægðir með þetta á föstudagskvöldi,” sagði Baldur.

Næsta próf er á móti Tindastóli fyrir norðan. Hvað ætlar Baldur að taka með sér úr þessum leik yfir í hann? „Það er bara það sama gamla. Fer yfir varnarleikinn og hvað við getum lært af því. Fer yfir sóknarleikinn og tek bara eitthvað gott úr því. Svo bara eru Stólarnir annað lið og við bara undirbúum hvað þeir eru að gera. Það verður bara krefjandi eins og alltaf,“ sagði Baldur.

Daníel Guðni: „Botninn datt úr þessu í fjórða leikhluta”

Daníel Guðni Guðmundsson, þjálfari Keflavíkur, var nokkuð brattur eftir tapið.

„Þetta var ekkert erfitt tap. Bara tap og partur af ferlinu. Þetta var snemma í tímabilinu og fyrsti alvöru andstæðingurinn okkar en ég upplifði margar framfarir, sérstaklega sóknarlega og sér í lagi þá í fyrri hálfleik. En botninn datt svolítið úr þessu í 4. leikhluta. Við ætluðum að fara að skora tvær, þrjár körfur í sókn. Það er svo erfitt að spila þannig gegn Álftanesi. Þeir eru fastir fyrir og við getum ekki verið að enda sóknirnar svona illa, ekki í jafnvægi og þess háttar. Hlaupin til baka verða bara verri og því fór sem fór,” sagði Daníel.

Bandaríkjamaðurinn Chaplin var farinn meiddur af velli þegar botninn datt en hversu alvarlegt var það? „Bara krampi. Það voru svolítið margar sóknir í þessum leik og við þurfum kannski að vera í aðeins betra standi. Þeir spila á fleiri mönnum og við erum aðeins íhaldssamari í því hvernig við rúllum liðinu okkar,” sagði Daníel.

En eru 110 stig ekki nóg til að vinna körfuboltaleik? „Nei, ekki gegn Álftanesi. Þetta er aðeins öðruvísi. Taktu bara hvernig tempóið þróaðist. Margar sóknir og bæði lið vilja hlaupa. Við náðum að hafa stjórn á mörgum köflum en vorum með enga stjórn í 4. leikhluta og því fór sem fór. Á hálfum velli einungis þá já eru 110 stig meira en nóg. En þetta er bara partur af prógramminu. Við þurfum bara að læra af þessum leik og hvernig við getum sigrað næsta leikm” sagði Daníel.

Er Daníel með hugmynd um hvernig hann vill læra af þessum leik? „Við vitum að við getum hlaupið völlinn ágætlega. Við erum með ágætis skotlið. Það er gott jafnvægi inn og út. Það að færa boltann milli kanta og sækja á réttum augnablikum er það sem við þurfum að vinna svolítið í. Sömuleiðis hraðaupphlaupsvörnin. En gott skotval og að passa boltann er besta hraðaupphlaupsvörnin,” sagði Daníel að lokum.