Ó­gilding réttar­haldanna gegn Clancy sett á ís vegna á­frýjunar

Eftir að dómarinn sagði frá niðurstöðu sinni og rétt áður en hann tilkynnti kviðdómendum frá þeirri ákvörðun, fór lögmaður Clancy, sem heitir Kevin Reddington, fram á að hann fengi að áfrýja til áfrýjunardómstóls í Massachusetts. Ógildingingin mun því ekki taka gildi strax þar sem dómarinn gaf lögmanninum klukkutíma til að leita til áfrýjunardómstólsins.

Í lok gærdagsins sagði steig formaður kviðdómsins fram og sagði að einn úr tólf manna hópnum færi ekki eftir skipunum dómarans hvað varðar leiðbeiningar um sönnunarbyrði og hugtakið „hafið yfir skynsamlegan vafa“ (e. beyond reasonable doubt).

Sjá einnig: Kviðdómandi neitar að fylgja reglum um sönnunarbyrði

Það þótti benda til þess að flestir kviðdómendur vilji sýkna Clancy eða sakfella á grunni vægari ákæra morð.

Lögmaður hennar vildi að þessum eina kviðdómenda af tólf yrði vísað úr kviðdómnum á þeim grunni að sá hefði brotið lög varðandi réttarhöld.

Reddington vill ekki að réttarhöldin verði gerð ógild, heldur að hún verði sýknuð. Fyrr í vikunni sagðist hann telja að Clancy hefði ekki andlega heilsu til að ráða við önnur réttarhöld.

Fyrir réttarhöldin í dag sagði Reddington að það yrði ekki sanngjörn niðurstaða fyrir Clancy að gera réttarhöldin ógild. Þá höfðu fjölmargir blaðamenn umkringt Reddington þegar hann var á leið í dómsal.

Gaf kviðdómendum eitt tækifæri

Fyrr í dag hafði William Sullivan, dómari, gefið kviðdómendum síðasta séns til að komast að sameiginlegri niðurstöðu um sekt Clancy eða sakleysi.

Sjá einnig: Kvið­dóm­endur fá enn eitt tæki­færi

Það skilaði ekki árangri.

Formaður kviðdómsins sendi skilaboð til Sullivans í dag sem í stóð:

„Það er með þungum hug sem við greinum frá því að okkur hefur ekki tekist að ná einróma niðurstöðu og teljum okkur ekki geta gert það.“

Dómarinn kallaði því Clancy og lögmann hennar, auk saksóknara, aftur í dómsal og sagði að hann gæti lítið annað gert en að ógilda réttarhöldin.

Saksóknarar voru sammála að það væri eina í stöðunni. En það vildi Reddington ekki. Hann fór fram á að kviðdómendur yrðu látnir reyna enn einu sinni. Þegar dómarinn vildi það ekki, bað Reddington um að rætt yrði við hvern kviðdómanda fyrir sig.

Hann vildi að þeir yrðu spurðir í einrúmi hvar þeir stæðu gagnvart ákærunum.

Jennifer Prague, saksóknari, sagði það ekki mega og að ógilding væri það eina í stöðunni.

Þá sagðist Sullivan ætla að ógilda réttarhöldin, þó að lögmaður Clancy vildi það ekki. Reddington mótmælti aftur og sagðist vilja áfrýja. Hann fékk klukkustund til þess.

Hér að neðan má sjá hvað gekk á í dómsal á fjórða tímanum í dag.

Eins og áður segir gaf dómarinn Reddington klukkustund en það var um klukkan 15:30 að íslenskum tíma. Ljóst er að það gæti tekið lengri tíma en það að fá niðurstöðu í málið.

Endi málið þannig að réttarhöldin verði ógilduð þurfa saksóknarar að ákveða hvort þeir ætli að rétta aftur yfir Clancy, gera einhverskonar samkomulag við hana eða jafnvel fella niður ákærurnar gegn henni alfarið.

Í janúar 2023 myrti Clancy þrjú börn sín og reyndi síðan að svipta sig lífi með því að stökkva út um glugga á annarri hæð. Hún lamaðist fyrir neðan mitti við fallið.

Lindsay Clancy kyrkti þrjú ung börn sín með æfingarteygjum og reyndi svo að svipta sig lífi.

Lögmenn Clancy hafa ekki neitað því að hún hafi myrt börnin en segja hana hafa þjáðst af miklum geðrænum vanda vegna fæðingarþunglyndis. Hún sé með geðhvarfasýki og að þunglyndislyf sem hún fékk eftir fæðingu þriðja barnsins hafi valdið því að geðheilsa hennar versnaði til muna.

Sjá einnig: „Hún drap börnin“

Þegar hún framdi morðin sagðist hún hafa heyrt rödd sem sagði henni að bana börnunum og svo sjálfri sér. Börnin voru fimm ára, þriggja ára og átta mánaða.

Sjá einnig: Móðirin sem Bandaríkjamenn deila um

Málið gegn Clancy hefur verið mikið á milli tannanna á fólki vestanhafs. Margir sýna henni samhug og telja málið sýna skort á geðheilbrigðisþjónustu fyrir nýbakaðar mæður. Aðrir vilja að Clancy sé refsað, þar sem morðin hafi verið skipulögð.

Fréttin hefur verið uppfærð.