Ó­dýrast að æfa með Þór en dýrast hjá Fram

ASÍ vekur athygli á því að töluverður munur getur verið á æfingagjöldum barna í íþróttum í tilkynningu til fjölmiðla í dag. Frístundastyrkir sveitarfélaga geti dugað skammt þar sem æfingagjöld nema allt að 175 þúsund krónum í handbolta 180 þúsund í körfubolta.

Ódýrast er að æfa handbolta hjá Þór á Akureyri. Þar er ársgjaldið 69 þúsund krónur fyrir börn sex til sjö ára gömul en dýrast hjá Fram þar sem ársgjaldið er 112.500 krónur, rúmlega 43 þúsund krónum meira.

Fyrir 10 til 11 ára börn kostar 85 þúsund krónur að æfa hjá Þór og 105 þúsund krónur fyrir 14 til 15 ára. Fram rukkar 161.650 krónur fyrir 10 til 11 ára, 76.650 krónum meira en Þór og þá kostar 176.060 fyrir 14 til 15 ára að æfa hjá Fjölni og 175 þúsund krónur hjá HK.

Í körfuboltanum er áætlað að ódýrast sé að æfa hjá UMF Heklu í aldurflokki 6 til 7 ára, um 53 þúsund krónur samanborið við 110.969 krónur hjá Stjörnunni, sem er rúmlega tvöfalt hærra.

Ódýrast er að æfa hjá Hamri í Hveragerði fyrir 14 til 15 ára, þar sem ársgjaldið er 97 þúsund krónur. Það er rúmlega 85 þúsund krónum ódýrara en í Stjörnunni þar sem ársgjaldið er 182.187 krónur.