„Eins og ljósa­staur fyrir drukkinn mann“

Hart átti sinn þátt í magnaðri rispu Knicks sem skoruðu 18 stig í röð, eftir að staðan hafði verið jöfn 53-53, og lögðu þannig grunninn að 109-93 sigri. Þeir höfðu áður unnið ótrúlegan endurkomusigur í fyrsta leik og eru því komnir í góða stöðu í einvíginu.

Hart skoraði 26 stig, þar á meðal fimm þrista, og hefur aldrei skorað fleiri stig í einum leik í úrslitakeppni. Hann sat fyrir svörum ásamt Karl-Anthony Towns á blaðamannafundi eftir leik og var spurður út í tölfræði úr leiknum en sagðist ekki mikið fyrir tölfræðigreiningu:

„Hún er eins og ljósastaur fyrir drukkinn mann. Maður getur stutt sig við hann, en hann kemur manni ekki heim,“ sagði Hart.

Hann uppskar hlátur viðstaddra og meðal annars frá Towns sem hafði greinilega gaman af ummælunum.

Towns skoraði 18 stig, Mikal Bridges 19 og Jalen Brunson einnig 19 auk þess að gefa 14 stoðsendingar.

Knicks eru núna tveimur sigrum frá því að komast í úrslitaeinvígi NBA-deildarinnar í fyrsta sinn á þessari öld, eða frá árinu 1999. Þeir hafa ekki orðið meistarar síðan árið 1973.

Donovan Mitchell skoraði 26 stig fyrir Cavaliers og James Harden 18. Liðið lenti einnig 2-0 undir gegn Detroit Pistons í síðustu umferð en vann það einvígi á endanum, 4-3.