„Ég þarf meira frá mínum reynslumestu mönnum en þetta“

Magnús vill meira frá sínu reynslumestu leikmönnum heldur en hann fékk í dag og þá sérstaklega á þessum kafla þegar leikurinn snerist Val í vil.

„Við erum með leikinn í okkar höndum, við erum með þær í köðlunum, akkúrat sem við viljum. Svo köstum við þessu bara frá okkur. Tökum óskynsamlegar ákvarðanir, erum að kasta boltanum út af og í hendurnar á þeim. Ég þarf meira frá mínum reynslumestu mönnum heldur en þetta.“

Aðspurður hvaða leikmenn væri um að ræða og hvað það væri sem fór úrskeiðis, þá hafði Magnús þetta að segja.

„Ég er að tala um þessa reynslumeiri menn, ég er að tala um Söndru, Birnu Berg og við erum með Britney. Við erum að gera okkur sekar um að brjóta í tvær mínútur þegar þær eru komnar í gegn í staðinn fyrir að halda okkur bara inn á vellinum og hleypa þeim í gegn, þetta er hvort eð er dauðadæmt. Sóknarlega erum við að kasta boltanum frá okkur og við erum bara ekki nógu skynsamar á þessum kafla.“

Þess má geta að Sandra Erlingsdóttir endaði með 14 mörk úr 18 skotum í leiknum, Birna Berg endaði með fjögur mörk úr ellefu skotum og Britney var með eitt mark og tvær brottvísanir, þar af var síðari þeirra afar klaufaleg.

Magnús segir að það hafi vantað upp á ákveðin klókindi í leik sinna leikmanna.

„Þú ert með svona leik og þá þarftu bara ákveðin klókindi til að klára og þetta var þannig leikur að eina sem okkur vantaði voru klókindi til að klára. Auðvitað er Hafdís frábær í markinu og ver þessa bolta, en á sama tíma getur maður sagt að við þurfum bara að vanda okkur betur í slúttunum þegar á hólminn er komið.“

Að lokum var Magnús spurður út í næsta leik einvígisins og hvort samgöngur gætu haft áhrif, enda Herjólfur í brennidepli í hverjum fréttatímanum á fætur öðrum um þessar mundir. Var Magnús beittur í svörum.

„Samgöngur hafa engin áhrif á þann leik, þær geta bara komið sér yfir eins og við degi fyrir leik. Það vorkennir þeim enginn með það. Þetta er bara lið sem við eigum að vinna, við erum bara betri en þetta Valslið og eigum bara að vinna þær og við sýndum það í dag að þetta verður hörku helvítis einvígi. Við tökum þetta,“ sagði Magnús að lokum.