Gísli, Ómar og Elvar tóku stórt skref í átt til Kölnar

Janus Daði Smárason gerði sitt besta til að gefa Pick Szeged von og skoraði fimm mörk en það voru félagar hans úr landsliðinu sem fögnuðu í leikslok.

Gísli Þorgeir Kristjánsson skoraði sjö mörk og Ómar Ingi Magnússon fimm en Elvar Örn Jónsson var ekki á meðal markaskorara.

Magdeburg var aðeins marki yfir í hálfleik, 15-14, en náði svo sjö marka forskoti þegar Gísli og Ómar skoruðu tvö mörk í röð og komu liðinu í 34-27. Leiknum lauk svo 35-28 eftir að Gísli skoraði lokamarkið.

Liðin mætast aftur í Þýskalandi eftir rúma viku, eða 7. maí.

Orri með tvö gegn Álaborg

Orri Freyr Þorkelsson og félagar í Sporting Lissabon misstu niður gott forskot gegn Álaborg í Portúgal og skildu liðin jöfn, 31-31. Orri skoraði tvö mörk í leiknum.

Gestirnir höfðu frumkvæðið stóran hluta fyrri hálfleiks en Sporting jafnaði rétt fyrir hlé, 16-16. Heimamenn komust svo mest fimm mörkum yfir í seinni hálfleik en fara eins og fyrr segir án forskots til Danmerkur.

Seinni leikur liðanna er 6. maí.