Davíð Tómas skipti um skoðun: „Ég var of fljótur á mér“

Stjarnan vann tveggja stiga sigur á Tindastóli, 105-103, í ótrúlegum leik í Ásgarði í Garðabænum í gær. Úrslitin réðust með flautukörfu Hilmars Smára í framlengingu.

Á meðan Stjörnumenn voru í skýjunum eftir sigurkörfu Hilmars Smára voru Stólarnir afar ósáttir og töldu að dæma hefði átt skref á bakvörðinn.

Íþróttadeild leitaði álits hjá Davíð í gær og þá sagði hann að karfan hefði verið lögleg. Hilmar Smári hefði ekki tekið of mörg skref.

Nú hefur Davíð skipt um skoðun eins og hann greindi frá í innslagi í upphitun Bónus Körfuboltakvölds fyrir leik Vals og Grindavíkur á Hlíðarenda.

„Nú langar mig aðeins að ræða við ykkur á einlægu nótunum. Ég kom í gær í viðtal þar sem ég fullyrti að þessi karfa væri lögleg. Og ég er kominn hingað í kvöld til þess að segja ykkur frá því að ég var of fljótur á mér og gerði mistök og mér þykir það ofboðslega leiðinlegt. Dómarahorn Davíðs á ekki að snúast um mig eða dómarana eða einhverjar persónur. Dómarahorn Davíðs á eingöngu að snúast um staðreyndir og það sem er rétt,“ sagði Davíð í innslagi sínu.

„Í morgun fór ég aðeins dýpra ofan í regluverkið. Ég hafði samband við vini mína erlendis sem eru bara að dæma á hæsta getustigi í Evrópu og slíkt. Við ræddum þetta aðeins okkar á milli og eftir mjög mikla ígrundun og pælingar komumst við að þeirri niðurstöðu að ég hefði bara fyrir alþjóð farið með rangt mál í gær. Þessi karfa á ekki að vera lögleg.“

Má ekki gera eins og hann gerir

Davíð útskýrði svo af hverju karfa Hilmars Smára hefði ekki átt að standa.

„Hérna lendir hann á báðum fótum og þegar hann lyftir upp vinstri fætinum, til að stíga í gegn þá, samkvæmt reglunum, er hann sjálfkrafa búinn að gera hægri fótinn á sér að snúningsfæti. Þar af leiðandi má hann stíga í vinstri fótinn og lyfta upp hægri og fara í skot en hann má ekki gera eins og hann gerir, lenda á báðum, stíga í vinstri og stíga niður í hægri og skjóta. Það að hann stígi niður í hægri fótinn er það sem gerir þessa hreyfingu ólöglega,“ sagði Davíð.

„Mitt fyrsta mat á þessu var að þegar hann lendir með báða fætur sé hann í núlli og eigi þar af leiðandi að geta stigið vinstri, hægri og farið upp. Það er svona fyrsta mat en samkvæmt reglunum og samkvæmt nákvæmlega hvernig þetta á að vera, að þegar hann er búinn að lyfta upp vinstri fætinum og stíga í hann er hann sjálfkrafa búinn að gera hægri fótinn að snúningsfæti og má þar af leiðandi ekki stíga aftur í hann.“

Hefur samúð með dómurunum

Davíð finnur til með dómurum leiksins sem þurftu að taka ákvörðun á þessu augnabliki í leiknum.

„Pælum aðeins í einu. Nú hef ég yfir tuttugu ára reynslu af körfuboltadómgæslu. Ég var af mörgum talinn bara einn besti dómari landsins. Ég er með margra ára reynslu af að dæma á erlendri grund og þrátt fyrir að ég fengi tækifæri til þess að horfa á þetta aftur og aftur hægt og spóla þurfti ég samt sem áður að kafa djúpt ofan í reglurnar, bera mig við kollega mína úti í Evrópu og eftir mikla ígrundun að komast þá að þeirri niðurstöðu að þetta eigi að vera skref,“ sagði Davíð. 

„Þannig að ímyndið ykkur aðstæðuna sem að þessir þrír menn, sem eru að dæma leikinn, eru í inni á vellinum. Þeir eru að taka þessa ákvörðun, á sekúndubroti. Þúsund manns í húsinu, allir brjálaðir. Þetta er ekkert grín. Alveg eins og það er ekkert grín að vera hér með Dómarahorn Davíðs. Það er ábyrgðarhlutverk. Og ég ætla hér með að biðja ykkur afsökunar á að hafa komið með rangt mál fram og mun í framhaldinu passa fullkomlega upp á það að allar þær upplýsingar sem koma frá mér séu kórréttar.“

Þriðji leikur Stjörnunnar og Tindastóls fer fram á Sauðárkróki á miðvikudaginn kemur. Með sigri tryggja Stjörnumenn sér sæti í úrslitum um Íslandsmeistaratitilinn.

Dómarahorn Davíðs má sjá í spilaranum hér fyrir ofan.