Sindri einum leik frá úrslitaeinvíginu

Bæði lið höfðu unnið sinn hvorn leikinn í einvíginu fyrir leik kvöldsins á Höfn í Hornafirði. Leikur kvöldsins var jafn í fyrsta leikhluta en í öðrum skildu leiðir þar sem Sindri skoraði 34 stig gegn 16, leiddu 56-33 í hálfleik, og það bil var of stórt fyrir Selfyssinga að brúa.

Sindri vann 103-76 sigur og leiðir einvígið 2-1.

Myles McCrary var stigahæstur Sindramanna með 24 stig en liðsfélagi hans Jason Gigliotti skoraði 19 stig og tók 16 fráköst.

Liðin mætast fjórða sinni á Selfossi á þriðjudaginn kemur. Sigurliðið spilar einvígi við Breiðablik um að komast upp í Bónus deildina á næstu leiktíð.