Glímir við mikið á­fall: „Enn­þá smá dauður að innan“

Frank Aron var í aðalhlutverki og skoraði 29 stig þegar Valur sló út Keflavík og kom sér í undanúrslit Bónus-deildarinnar í körfubolta, þar sem liðið mætir Grindavík.

Hann hafði mest skorað 20 stig í leik í úrslitakeppni þar til í gær og síðustu mánuðir hafa verið honum afar erfiðir, eftir að pabbi hans Frank Booker eldri lést í febrúar. Engu að síður lék Frank Aron stórkostlega í gærkvöld en hann minntist svo pabba síns í viðtali við Andra Má Eggertsson:

„Ég veit að hann horfir niður og er mjög ánægður,“ sagði Frank Aron klökkur en viðtalið við hann og Finn Frey í Körfuboltakvöldi í gær má sjá hér að neðan.

„Þetta er búið að vera drulluerfitt og ég get alveg verið hreinskilinn með að ég er ennþá smá dauður að innan en þetta er partur af lífinu og ég þarf bara einhvern veginn að lifa með þessu. Hann veit að ég elska hann mjög mikið og hann elskaði mig út af lífinu eins og þið sáuð fyrir tveimur árum síðan. Ég veit að hann er algjör Valsari og hann er mjög ánægður núna,“ sagði Frank Aron.

Tilfinningavera og yndi að vera í kringum

Finnur var svo spurður út í lærisvein sinn og hvernig það hefði verið fyrir hann og liðið að takast á við það þegar Frank Booker lést, 61 árs gamall.

„Aron er mikil tilfinningavera, mikil orka í honum og hann kemur til dyranna nákvæmlega eins og hann er klæddur. Algjört yndi að vera í kringum og getur verið smá erfiður líka á móti þegar hann er í ADHD-inu sínu að rugla eitthvað

Þetta er svakalegt áfall sem hann lendir í. Pabbi hans fer mjög snögglega og það er erfitt að vera í annarri heimsálfu. En hann og Halla eru búin að tækla þetta mjög vel og við búnir að taka utan um hann eins og hægt er,“ sagði Finnur en brot úr viðtalinu við hann má sjá í spilaranum hér að ofan.