EM-sæti í húfi: „Mjög spennt að sjá hvar við stöndum núna“

Ísland tapaði 26-25 fyrir Portúgal í október, hefur einnig tapað tvisvar fyrir Færeyjum og einu sinni gegn Svartfjallalandi. Eini sigurinn í undankeppninni, í hinum leiknum gegn Svartfellingum, gerir hins vegar að verkum að liðið getur með sigri í dag náð 3. sæti riðilsins af Portúgal og komist á EM.

Elín Rósa segir margt hafa farið úrskeiðis í tapinu gegn Færeyjum síðasta miðvikudag en nú snýst allt um úrslitaleikinn við Portúgal.

„Þetta snýst um að vera á þessari uppleið sem við vorum, þó að þessi leikur [við Færeyjar] hafi verið eitthvað allt annað. Við höfum verið með sterkan stíganda og okkur langar að fylgja því áfram,“ sagði Elín Rósa í viðtali við Val Pál Eiríksson í aðdraganda leiksins.

Eins og fyrr segir tapaði Ísland gegn Portúgal og Færeyjum í fyrstu leikjum undankeppninnar í haust, áður en liðið fór svo á HM í desember og stóð sig vel.

„Þá vorum við kannski með svolítið nýtt lið og ég held að við séum búnar að taka skref fram á við síðan þá. Ég er mjög spennt að sjá hvar við stöndum núna og við ætlum okkur að vinna þennan leik, í fullri höll,“ sagði Elín Rósa.

„Við ætlum samt fyrst og fremst að fókusa á frammistöðu. Ef við gerum það, sýnum frammistöðu, þá hef ég mikla trú á að við náum að klára þennan leik.“