Fjöldi apóteka sam­einast undir vöru­merki Apó­tekarans

Fram kemur í tilkynningu frá félaginu að breytingin sé hluti af nýrri stefnu sem var kynnt fyrir starfsfólki í dag á stefnufundi félagsins samhliða breytingum á vörumerkjum félagsins.

Móðurfélagið Lyf og heilsa rekur 27 lyfjaverslanir víðs vegar um landið ásamt tveimur gleraugnaverslunum og fleiru. Samhliða breytingunum kemur fram að nýr vefur og app verði kynnt til leiks á næstu misserum og vildarkerfi sem mun heita Apótekarinn+.

„Hlýtt vörumerki Apótekarans er aðgreinandi og sterkt. Apótekarinn hefur hlotið margar viðurkenningar og er þekkt fyrir góða þjónustu og hagstæð verð. Líkt og nafnið ber með sér lýsir það vel þeirri þjónustu sem við viljum bjóða þar sem viðskiptavinir okkar eru í flestum tilfellum að leitast eftir að líða betur. Við viljum vera ráðgjafar þegar á þarf að halda og þar sem engin umræðuefni eru óþægileg,“ er haft eftir Eddu Hermannsdóttir forstjóri Lyfja og heilsu.

„Á næstu misserum kynnum við nýjan vef, app og öflugt vildarkerfi sem mun gera upplifun viðskiptavina enn betri. Þar verður lögð mikil áhersla á heilsufræðslu frá starfsfólki og öðrum fagaðilum í heilbrigðisþjónustu. Vöruframboð félagsins í heilsuvörum verður eflt og við munum styrkja stöðu okkar með mesta úrval landsins af snyrtivörum á þessum markaði. Við hlökkum til að kynna nýjan og endurbættan Apótekara til leiks.“