For­múlu 1 keppnum í Mið-Austurlöndum af­lýst

Samkvæmt heimildum Sky Sports verður þessi ákvörðun alþjóða aksturssambandsins tilkynnt eftir keppni helgarinnar í Kína.

Sambandið hefur ekki gefið neitt formlega út en er sagt áhyggjufullt um stöðuna í Mið-Austurlöndunum í ljósi stríðsátakanna sem brotist hafa út síðan Ísrael og Bandaríkin réðust inn í Íran.

Keppnir áttu að vera haldnar í Barein þann 10. - 12. apríl og í Sádi-Arabíu þann 17. - 19. apríl, en bæði ríki hafa orðið fyrir sprengjuárásum Írana að undanförnu.

Heimildir Sky Sports herma að nýjum keppnum verði ekki komið fyrir á dagatalinu, enda hefði það í för með sér umfangsmiklar breytingar.

Tíminn til stefnu sé of skammur til að skipuleggja keppnir í Portúgal og Ítalíu eins og komið hafði til greina.

Það myndi þýða að tímabilið styttist niður í 22 keppnir, frekar en 24. Þar að auki yrði fimm vikna frí milli kappakstursins í Japan í lok mars og kappakstursins í Miami í byrjun maí.

Formúla 1 er í Sjanghæ í Kína um helgina. Tímatakan á laugardag og keppnin á sunnudag verða í beinni útsendingu á Sýn Sport Viaplay.