Sér í gegnum Dag: „Hann er bara að segja þetta til að spila með Ís­lendinga“

„Þetta er skemmtilegt einvígi, fullt af sögulínum. Ég elska Króata sem íþróttaþjóð og á erfitt með að hata þá. Þeir eru bara geggjaðir og jafn bilaðir og við. Jafnvel bilaðari. Við erum búnir að tapa fyrir þeim tvisvar, illa, á rétt rúmu ári,“ sagði Einar Jónsson í Besta sætinu um bronsleik dagsins. 

Í viðtali eftir tap í úrslitaleik gegn Þjóðverjum á föstudaginn sagði Dagur í viðtali við Henry Birgi að orkustigið í Króatíska liðinu væri lágt. 

„Það þarf að pumpa í dekkin og gera sitt besta,“ sagði Dagur meðal annars en Einar segir Dag hafa verið byrjaðan að reyna spila með Íslendinginn þarna.

„Ég ætla ekki að segja að það sé uppgjafartónn í Degi. Hann er bara að segja þetta til að spila með Íslendinga. Króatar mæta til búnir í stríð. Þetta eru þvílíkir stríðsmenn, geggjaðir íþróttamenn. Þeir eru ekki að fara mæta í þennan leik og láta valta yfir sig. Þetta verður erfiður leikur en það er lag fyrir okkur að sigra þá. Þessi leikur er sennilega þriðji stærsti leikur sem íslenskt landslið hefur nokkurn tímann spilað. Þetta er rosaleg stund.“