Vonar að skólarnir verði frjálsir frá símum í haust

Greint var frá því á dögunum að frá því að ný lög í Ástralíu, um samfélagsmiðlabann ungmenna, tóku gildi um áramótin hafi samfélagsmiðlarisinn Meta lokað um hálfri milljón aðganga notenda, sem eru yngri en sextán ára. Ástralir voru fyrstir þjóða til að ríða á vaðið en bann sem þetta hefur víiða verið til umræðu.

Danir hafa sett svipuð lög, sem banna börnum undir fimmtán ára að nota samfélagsmiðla. Hins vegar mega börn þrettán ára og eldri vera með reikning að gefnu leyfi foreldra sinna. Norðmenn hafa nú til skoðunar að setja á samfélagsmiðlabann og samkvæmt skoðanakönnnunum er ríkur stuðningur við slíku banni hérlendis.

Þingsályktunartillaga Skúla Braga Geirdal, varaþingmanns Framsóknarflokksins, um að fela ráðherra að leggja fram frumvarp um bann sem þetta var samþykkt á haustþinginu.

„Ég tel að það sé góð samlegð með því og til dæmis símafríinu, sem verður vonandi orðið að lögum núna fyrir sumarið. Ég er að vona það að skólarnir okkar geti í haust komið frjálsir inn frá símunum og börnin okkar fái símafrí,“ segir Inga Sæland, barna- og menntamálaráðherra. 

Hvetja til banns til sextán ára

Áðurnefnd þingsályktunartillaga er í umsagnarferli hjá allsherjar- og menntamálanefnd Alþingis. Þegar hafa átta umsagnir borist, meðal annars frá Persónuvernd, Embætti landlæknis og Fjölmiðlanefnd.

Í umsögn landlæknis er sérstök hvatning til að miðað verði við sextán ára aldur hérlendis í ljósi þess að sextánda aldursárið marki ákveðin félagsleg skil í lífum ungmenna, á milli grunnskóla og frekara náms eða atvinnu.

„Mér finnst sextán ára aldur bara hugnast mér vel eða hvort heldur, fimmtán ára eins og Norðurlöndin okkar eru með. Við eigum eftir að finna það út en við bara gerum það saman,“ segir Inga.