„Alltaf gaman að fara upp og negla“

„Ég er ánægð með hvernig við mættum til leiks, við vorum ákveðnar og ætluðum okkar að vinna þennan leik. Allar sem komu inn á gáfu hundrað prósent í þetta og engin gaf neitt eftir“ sagði Thea strax að leik loknum.

Thea fékk oft mikið pláss til að hoppa upp í skot og hávörnin hjá Úrúgvæ átti ekkert í hana. Hún segir það þó ekki hafa verið uppleggið fyrir leik, heldur fann hún bara flæðið.

„Það er alltaf gaman að fara upp og negla honum á markið… Þetta gerist bara í leiknum, Elín og Elín draga mjög mikið í sig og þegar ég næ að koma á ferðinni þá var allt opið.“

Thea þurfti líka að takast á við þær úrúgvæsku í vörninni og virtist ekki eiga í miklum vandræðum með þær, hún var allavega ekki með glóðarauga eins og eftir leikinn gegn Serbíu.

„Ekkert nýtt glóðarauga en þær eru sprækar sko, mjög mikið einn á einn og aðeins öðruvísi tempó en við erum vanar. Þær hættu líka aldrei, maður þurfti að halda í þær alveg þangað til flautið kom, því þær reyndu alltaf að snigla inn skotum þegar manni fannst fríkastið eiga að vera komið. En við gerðum þetta bara nokkuð vel“ sagði Thea en viðtalið má sjá í spilaranum að neðan.