Elín Klara var frá­bær en ekkert gekk hjá Al­dísi Ástu

Elín Klara Þorkelsdóttir var frábær með liði Sävehof sem gaf eftir á lokakaflanum og tapaði illa með níu mörkum á útivelli á móti Höörs HK, 31-22.

Elín Klara var allt í öllu í liði Sävehof og skoraði alls tíu mörk í leiknum. Hún skoraði fjórum mörkum meira en næsta kona í hennar liði.

Elín skoraði fimm mörk úr vítum og nýtti fimm af átta skotum sínum utan af velli.

Sävehof var yfir í leiknum í seinni hálfleik en þá fór allt að ganga á afturfótunum og liðið missti frá sér leikinn.

Þetta var fyrsta tap Sävehof í deildinni í vetur en liðið hafði unnið fyrstu þrjá leiki sína.

Aldís Ásta Heimisdóttir og félagar hjá Svíþjóðarmeisturum Skara urðu líka að sætta sig við tap en liðið tapaði með fimm mörkum á útivelli á móti Önnereds, 28-23.

Það gekk ekkert upp hjá Aldísi sem nýtti aðeins eitt af átta skotum sínum í leiknum. Hún átti eina stoðsendingu en þetta var hauskúpuleikur á hennar mælikvarða.

Það munaði miklu um það enda Aldís vanalega í stóru hlutverki hjá liðinu.

Skara hefur nú tapað tveimur af fyrstu fjórum leikjum tímabilsins.