For­maður dómaranefndar KKÍ tjáir sig ekki

Jón Bender, formaður dómaranefndar KKÍ, sagði við Vísi síðdegis að um starfsmannamál væri að ræða og hann hygðist ekki ræða þau opinberlega. Hann gæti að öðru leyti ekki tjáð sig um málið.

Þar kveður við sama tón og hjá framkvæmdastjóra sambandsins, Hannes S. Jónssyni, sem sagði sambandið ekki ætla að tjá sig að svo stöddu við Vísi í gær.

Spjót hafa beinst að störfum dómaranefndar og sambandsins eftir viðtal Vísis við Davíð Tómas í gærmorgun. Hann sagðist þá hættur dómgæslu, aðeins 36 ára að aldri, vegna útilokunar sambandsins. Hann fær ekki verkefni á vegum KKÍ þrátt fyrir að vera á meðal fremri dómara landsins, vegna meints samskiptavanda.

„Þetta er ekki uppbyggilegt starfsumhverfi. Þeir sem eru við stjórnvölin hjá KKÍ hafa skapað þessa menningu, sem veldur því að metnaðarfullt fólk hrökklast úr dómgæslustörfum,“ sagði Davíð meðal annars í viðtalinu um starfsumhverfið sem nefndin hefði skapað.

Davíð sé ekki sá eini sem hafi hrökklast úr stéttinni vegna samskipta við nefndina, en Jón Guðmundsson segir svipaða sögu.

„Maður hafði skoðanir á hlutunum og þegar maður varpaði þeim fram fór það misvel í fólk. Ég skil það alveg að menn hafi sitt hvora skoðunina á þessu. En á sínum tíma fannst mér þetta frekar skítt,“ sagði Jón meðal annars þegar hann ætlaði að snúa sér að dómgæslu á ný eftir hlé meðan hann sinnti þjálfun.

Margur innan körfuboltahreyfingarinnar hefur krafist svara frá sambandinu, meðal annars Hermann Hauksson, sem er sérfræðingur Bónus Körfuboltakvölds.

„Það er einhverstaðar brotið þarna inn á milli og við þurfum að komast til botns í þessu, við þurfum að fá almennileg svör. Þetta er slæmt, þarna eru tveir frábærir dómarar sem eru í miklum metum veit ég hjá leikmönnum deildarinnar því þetta eru dómarar sem kunna sitt fag. Mér finnst þetta slæmt fyrir hreyfinguna,“ sagði Hermann í Sportpakkanum á Sýn í gær.