Enska augna­blikið: Hamingjureiturinn

Albert Brynjar er mikill Arsenal-maður og einnig mikið í golfinu. Hann hugsar mikið til Wengers þegar hann er beðinn að rifja upp minningar úr ensku úrvalsdeildinni og kemur tvennt upp í hugann, sem hann tengir við kvikmyndina Happy Gilmore. Bæði augnablik eru frá Old Trafford í Manchester.

„Maður hugsar alltaf um Wenger-tímann. Skiljanlega. Því Arsenal hefur ekkert unnið síðan þá. Hann hefur mótað mann um margt í lífinu, Wenger. Maður á svona, eins og Happy Gilmore, ég hef notað hans taktík - ég á minn happy place - það er Wenger í fríinu sínu á ströndinni, þegar hann liggur í sandinum,“ segir Albert.

„Þegar ég er að reyna að ná einbeitingu í golfinu eða hverju sem er, þá reyni ég að fara á minn happy place. Þá sé ég Wenger þarna fyrir mér, liggjandi glæsilegur á ströndinni,“

„En eins og Happy Gilmore á ég líka bad place. Ég næ stundum ekki að kúpla mig út þegar skapið er alveg farið. Þá er það Wenger sem stendur þarna á Old Trafford þegar hann var rekinn upp í stúku fyrir að sparka í flösku. Svo var hann látinn standa þarna á þessum palli í einhvern tíma á meðan United-menn gerðu grín að honum. Virðingin var engin fyrir Le Profeseur,“ segir Albert.

Það eru þó einnig góðar minningar af tíma Wengers, til að mynda stýrði hann Arsenal til Englandsmeistaratitils árið 2003-04 þar sem liðið tapaði ekki leik alla leiktíðina og er enn eina liðið í sögu úrvalsdeildarinnar til að afreka það. Það var þó titill tveimur árum fyrr, eða augnablik sem tryggði titilinn, sem gleymist seint.

„En uppáhalds Wenger augnablikið mitt er þegar Arsenal vann deildina á Old Trafford með 1-0 sigri 2001-02 tímabilið. Það var enginn Henry og enginn Pires í þeim leik en það var Wiltord sem sá um Rauðu djöflana. Hann setti Ljungberg í gegn, sem var með rauða hárið sitt, en átti fáar klippingar eftir. Ljungberg átti skot sem Barthez, uppáhalds markvörður hlutlausra hjá United,varði beint fyrir fætur Wiltord. Sá vanmetni tryggði Arsenal titilinn,“ segir Albert.

„Svo er hluti af ástæðunni fyrir því að maður gleymir þessu augnabliki aldrei þessar stórglæsilegu gylltu Sega-treyjur sem Arsenal spilaði í,“ bætir Albert við.

Albert Brynjar verður öflugur í umfjöllun Sýnar Sport frá enska boltanum í vetur. Hann verður fastagestur í bæði Doc Zone á laugardögum þar sem öllum leikjum dagsins verður fylgt eftir samtímis sem og með Stefáni Árna Pálssyni í VARsjánni á þriðjudagskvöldum þar sem hver umferð verður gerð upp á skemmtilegum nótum.

Allar minningar sérfræðinga Sýnar af enska boltanum má sjá listaðar upp að neðan.

Hér má tryggja sér áskrift að enska boltanum hjá Sýn Sport.

Enska úrvalsdeildin fer af stað í kvöld með leik Liverpool og Bournemouth klukkan 19:00. Upphitun hefst á Sýn Sport klukkan 18:30.